ملاح التقلية

ملاح التقلية

المكونات (حسب حوجتك)
بصل
لحمة مفرومة (او لحمة منشفة)
حبة ماجي (عشان الطعم)
طماطم (برضو للطعم)
صلصة
زيت
توم
ويكة
ماء
بهارات حسب الرغبة

الطريقة

1- تحمري البصلة في الزيت لغاية ما لونها يكون بني فاتح (ده البديها طعم التقلية الحقيقي)- (وليس بني غامق لانه طعمها ببقى مر)
لانها لمن تكون صفرا او دهبية بيكون طعم الملاح عادي (انا بحمر الثوم مع البصل بتدي الملاح نكهة جميلة بس ما تختيه
من البداية يعني لما البصل يبدأ لونه يصفر عشان نكهته ما تروح )
2- تطلعي البصل المحمر من الزيت وتختيه في الخلاط وتخلطيه مع الطماطم والصلصة
ولو حبيتي تخلطي معاه التوم والبهارات (عشان الزمن في حال ما عملتي التوم مع البصل )

3- في الزيت الحمرتي فيه البصل تختي اللحمة المفرومة وتخليها تغلى لغاية ماتستوي
لو ما بتحبو اللحمة المفرومة تكون (مدرشة) ممكن تديها خلطة بسيطة بعد ما تنتهي
من خلط المكونات السابقة (يعني تضيفيها للخليط السابق)- بس ما تخلطيها شديد
عشان ما تدوب شديد-
4- تضيفي الخليط السابق للحمة
5- تضيفي الموية (حسب الكمية الانتي عايزاها بس تحاولي ما تكتريها عشان تبقى ليك
تقيلة شوية) وتضيفي الماجي وتخليها تغلى زي دقيقتين لانه المكونات اصلا نجيضة
6- تخليها تغلى شوية
7- وتاني تخفضي النار شديد (عشان تعمل ليك وش)
8- تطفي النار وتضيفي الويكة بالملعقة شوية شوية وتفركي (بالمفراكة) عشان ما تتدردم