الـــــــــــــــــــــــــــــبوش

عشان زمن ماف ونحنا السودانيين مستعجلين شديد في الدنيا دي ..


قررنا انو نخترع اكلة لا تاخد دقايق في التحضير وثواني في الاكل .. الا وهي البوووووووش ..



المقادير:
- فول
- ماء
- خبز
- زيت
- جبن
- ملح ، فلفل ، بهار حسب الرغبة

بقية المقادير التالية اختيارية :
طعمية ، مش ( بكسر الميم واسكان الشين)
إلى هنا ممكن تكون المقادير كافية لكن لامانع من الزيادة
_ يعني لو عندكم بططساية صغيرة كده مسوية زحمة في البيت اقلوها واضيفو ، واذا في باذنجان ضايع اقلوه برضو واضيفو ، كذلك الحال بالنسبة للطماطم ( لا تقلوها) بس تقطع ، خيار ، جزر .... الخ

الطريقة :
1.يسخن الفول ويضاف اليه الماء ويترك لمدة 15 دقيقة
نسبة الفول إلى الماء = 1/3 فول +2/3 ماء او تزيد

2.يقطع الخبز ويوضع في أكبر صحن في البيت ـ حبذا لو يكون قدر كير
3.يرش على الخبز الملح والفلفل والبهار والطعمية وبقية المقادير عدا الفول و الجبن
4.يضاف الفول ونقوم بالتقليب المستمر
في هذه المرحلة لازم تتكسر حبات الفول على العيش وتختفي تقريبا ( يعني نهرسو)
5.أثناء التقليب يضاف الجبن ونصف مقدار الزيت ونستمر في التقليب
6.نقوم بإضافة باقي الزيت

وهكذا نكون قد انتهينا




فوائد البوش :
1.ملئ بالبروتينات .
2.مريح لطلبة الجامعات والعزابة ( أكلة ما دايرة مجهود)
3.مريح لربة المنزل في حالات الكسل والحنين ( لو كانت طالبة ح تسترجع أيام الجامعة)
4.اذا كان عندكم رغيف كتير في البيت مابين بايت له يوم أو يومين أو جديد وماعرفتو تتصرفو فبه فالبوش هو الحل
5.يعزز مبدأ ( اللي عندك جيبه)

ملاحظات وارشادات :
1.لكل أكله سر مافي زول بعرفو . واليوم انا جبت ليكم سر البوش
2.لا يوجد مكان للحناكيش والشهادات العربية فيها
3.ممنوع منعا باتا أكل البوش بالملعقة ( اي انتي يا فلانة سامعة الكلام دا ولا لا ) . لأنه يقلل من سمعتها واحترامها
4.ينصح دائما بعد البوش بكباية شاي وبفضل فنجان قهوة تقيلة ..


5.يفضل اكل البوش قبل النوم .. لانه يساعد في النوم .. لكن مشكلتو بعد تنوم حا يضايقك ولو عندك حريقان الله قال بي قولك ..


أسئلة متوقعة :
1.لماذا اسم بوش؟
صراحة عن نفسي لاأعرف لماذا هذا الأسم . ولمن سألتهم الاجابات كانت مختلفة لكن المتفق عليه ** جورج بوش الأب**
( أعدكم أبحث عن سر التسمية مرة أخرى)

2.متى تؤكل ؟
في أي زمان وأي مكان
لكن اذا فطرتوا بيها ماحا تتغدوا ولو اتعشيتو بيها ماحا تفطروا وهكذا .....
نستنتج *** الوجبة بعد البوش ملغية ***
وهذا أهم فوائدها ..