باذنجان بالخل والتوم

باذنجان بالخل والتوم

المقادير:

3 بتنجانات وسط
فلفل رومي أو حامي
زيت للقلي

الصوص:

8 فصوص توم مفرومين ومعاهم فلفلاية حامية
4 معالق خل كبار
معلقتين زيت
ربع كوب ماء
لمونة كبيرة


الطريقة:

نغسل البتنجان كويس ونقشر بالسكين الطبقه السودة بالطول واحدة ونسيب واحدة ونقطعه دواير متوسطة السمك.. ونرش عليه شوية ملح علشان مايسودش وينزل ميته ونسيبه حوالي تلت ساعة ونغسله .
نقلي البتنجان والفلفل ونطلعهم نحطهم في طبق في ورق مناديل علشان يتشرب الزيت.
وماننساش قبل مانقلي الفلفل نغسله ونحطه في مصفي ونشقه شقه بالطول من تحت علشان مايطرطش زيت واحنا بنقليه.

الصوص:

نفرم التوم ونحطة مع معلقتين الزيت في طاسة ونقلبه لحد ما لونه يصفر وبعدين نضيف الخل وبعدين الميه يادوبك تغلي ونطفي النار علي طول.
نجيب طبق غويط ونبدأ نرص طبقة بتنجان وفوقيها طبقة فلفل ونعصر عصرة لمون وهكذا لحد ما ننتهي من الكميه اللي قليناها .
ممكن تعملي جمبها بطاطس مقليه ورز بالعدس الأصفر
أو كرنبيت مقلي وتتاكل بالعيش